Yo’qotganingizni qanday topasiz: samolyot yoki aeroportda qanday harakat qilish zarur?

Sayohatlarda narsalarni yo‘qotish yoqimsiz holat, ammo vahimaga tushishga hojat yo‘q - agar tez harakat qilsangiz, unutilgan narsalarning aksariyatini topish mumkin. Agar yo‘qolgan narsa quloqchin bo‘lsa, bunga ko‘nikish osonroq (albatta bu ham yoqimsiz), lekin pasport yoki telefonni yo‘qotish sayohatingizni jiddiy qiyinlashtirib qo‘yishi mumkin. Keling, turli vaziyatlarda qanday yo‘l tutish kerakligini ko‘rib chiqamiz.

Agar samolyotda biror narsani qoldirib, bortni tark etgan bo‘lsangiz

Xotirjam bo‘ling va trap yoki chiqish joyiga qaytishga harakat qiling. Samolyot qo‘ngandan so‘ng bort kuzatuvchilari salonni ko‘zdan kechirishlari, yuqori tokchalar va o‘rindiqlar ostini tekshirishlari shart. Topilgan buyumlar aeroportning qo‘nish terminalidagi «Lost and Found»‎ bo‘limiga topshiriladi. Biroq, biror buyumingiz yo‘qolganini tezda aniqlasangiz, aviakompaniya yoki aeroport xodimiga murojaat qilishingiz mumkin. Ular ekipaj bilan bog‘lanib, sizning qatoringiz va joyingizni tekshirib ko‘radilar. Ratsiyali har qanday xodim sizga yordam berishi mumkin, shuning uchun so‘rashdan tortinmang. Eng muhimi – samolyot keyingi reysga uchib ketishga ulgurmasin, aks holda yo‘qotganingizni topish qiyinlashadi.

Agar siz allaqachon aeroportda bo‘lsangiz

Bagaj topshirish hududini tark etmang va zudlik bilan aviakompaniyangiz vakiliga murojaat qiling, ma’lumot berish peshtaxtasi yoki Lost and Found (topilmalar byurosi) ofisini toping. Xodimlar ekipaj bilan bog‘lanib, topilgan narsalar topilmalar byurosi yoki saqlash xonasiga topshirilmaganligini tekshiradilar.

Ba’zi hollarda yo‘qolgan buyumlar aeroport ma'muriyati bo‘limiga tushishi ham mumkin, shundan so‘ng politsiyachilar chipta rasmiylashtirish paytida qoldirgan aloqa ma’lumotlaringiz orqali siz bilan bog‘lanishadi. Faqat, agar siz parvoz paytida boshqa yo‘lovchining yoki bo‘sh o‘ringa o‘tirgan bo‘lsangiz, aviakompaniya xodimlariga bo‘sh joyda aynan qaysi yo‘lovchi o‘tirganini aniqlash qiyinroq bo‘ladi (chunki ularning tizimida siz boshqa joyda ro‘yxatdan o‘tgan bo‘lasiz).

Agar aeroportni tark etgan bo‘lsangiz

Umidingizni so‘ndirmang: aeroportning topilmalar byurosi yoki aviakompaniya vakillari bilan bog‘laning. Ko‘pincha unutilgan narsalar uchib ketgan shaharda qoladi yoki yo‘nalishning oxirgi manziliga yoxud hatto aviatashuvchining asosiy markaziga yuboriladi. Agar uzoqda bo‘lsangiz, aeroportning aloqa ma’lumotlarini oldindan tekshirib qo‘ying - ba’zi aeroportlarda yo‘qolgan narsalarni qidirish uchun onlayn shakl mavjud.

O‘zbekiston aeroportlarida topilmalar byurosining aloqa ma’lumotlari:

• Toshkent xalqaro aeroporti (TAS): +998 78 140 28 01
• Samarqand xalqaro aeroporti (SKD): +998 66 232 36 59
• Farg‘ona xalqaro aeroporti (FEG): +998 73 241 60 04

Agar narsalaringiz topilsa, siz bilan o‘zlari bog‘lanishadi. Bunda yo‘qolgan buyumni olish uchun chiptangiz va pasportingizni olib kelish muhim. Misol uchun, Toshkentda unutilgan narsalar uch oy davomida aeroportning saqlash xonasida saqlanadi. Agar shu vaqt ichida egasi topilmasa, ular yo‘q qilinadi.

Yo‘qotishlarning oldini olish uchun layfxaklar:

• Yo‘qolgan buyum haqida qancha ko‘p ma’lumot bersangiz, uni topish imkoniyati shuncha yuqori bo‘ladi.

• Reys raqami va hujjatlar - ularni albatta yoningizda saqlang va bortga chiqish talonini tashlab yubormang.

• Pasport - eng muhimi, uni yo‘qotmaslikka harakat qiling. Hujjatni yo‘qotish vaziyatni ancha murakkablashtiradi.

• Samolyotdan chiqishdan oldin o‘rindiq cho‘ntaklari va yon-atrofni ko‘zdan kechiring.

• Biror buyum sizga tegishli ekanini osonroq isbotlash uchun sayohatdan oldin bagaj va qo‘l yuklaringizni suratga oling.

• Buyumlaringizni markirovka qiling - aloqa ma’lumotlaringiz yozilgan stikerlar yoki yorliqlar yo‘qolgan narsalarni qaytarishga yordam beradi. Standart yuk yorliqlarini telefon raqamingiz va email manzilingiz yozilganlariga almashtiring.

• Narsalarning joylashuvini real vaqt rejimida kuzatish uchun smart yorliqlardan (AirTag, Tile va shunga o‘xshash) foydalaning.

• Talab qilib olinmagan yuklarni saqlash kamerasi unutilgan narsalarni qabul qiladi, ammo saqlash muddati cheklangan (odatda 1 oydan 6 oygacha).

• Agar bagaj aviakompaniya aybi bilan yo‘qolgan bo‘lsa, u eng yaqin reys bilan sizga bepul qaytarib jo‘natiladi (ba’zan hatto eshigingizgacha yetkazib berishadi).

• Agar siz o‘zingiz buyumni yo‘qotgan bo‘lsangiz-u, keyin u topilgan bo‘lsa, jo‘natish uchun qo‘shimcha haq to‘lashingizga to‘g‘ri keladi.

• Hujjatlaringizni bulutli xotira va telefonga skanerlab, shuningdek, bosma shaklda ham saqlang.

Agar siz ushbu tavsiyalarimizga amal qilsangiz, yo‘qolgan narsalarni tezda topishingiz va sayohatingiz davomida ortiqcha muammolardan holi bo‘lishingiz mumkin.