Uzoq vaqtli almashish paytida nima bilan shug‘ullanish mumkin

Bugungi kunda chiptalar narxi ko‘proq mavsumga, talabga va yo‘nalishga bog‘liq bo‘lib qoldi. Biroq, ba’zan uzoq vaqtli almashishlar haqiqatan ham pul tejashga imkon beradi. Agar almashish muqarrar bo‘lsa, uni qulay o‘tkazish uchun vaqtni to‘g‘ri rejalashtirish muhim ahamiyatga ega.

Pichirlashamizmi? Ko'proq maslahatlar va sirlar bizning ijtimoiy tarmoqlarimizda

Telegram

Instagram

Qaysi almashish uzoq vaqtli hisoblanadi?

• 1–3 soat – qisqa vaqtli almashish. Bu muddat shoshilmasdan samolyotga chiqish joyiga yetib olish, yengil tamaddi qilish va zarur bo‘lsa, pasport nazoratidan o‘tish uchun yetarli. Biroq xotirjamlikka berilmaslik kerak – ayniqsa Istanbul, Doha yoki Dubay kabi yirik aeroportlarda.
• 3–5 soat – o‘rtacha almashish vaqti. Aeroport shahardan uzoqda bo‘lsa, uni tark etmaslik ma’qul. Bu vaqtni dam olishga, terminal bo‘ylab sayr qilishga yoki launj zonasiga tashrif buyurishga sarflash mumkin.
• 6+ soatlik – uzoq vaqtli almashish. Shaharga chiqib, asosiy diqqatga sazovor joylarni ko‘rib chiqish yoki hech bo‘lmaganda shunchaki oyoq cho‘zish imkoniyati bor.

Agar sizda tanlov imkoniyati bo‘lsa, yangi shaharni ko‘rib olish mumkin bo‘lgan, lekin kechikish xavfini keltirib chiqarmaydigan tarzda parvozlar orasidagi almashishni rejalashtirganingiz ma’qul.

Almashishdan oldin nima qilish kerak

1. Shaharga chiqish uchun viza kerak yoki yo‘qligini tekshirib ko‘ring.

Yevropa Ittifoqi mamlakatlari, BAA, Turkiya yoki Rossiya orqali uchmoqchi bo‘lsangiz, viza talablarini oldindan aniqlab oling. O‘zbekiston fuqarolari uchun:

• Turkiya, Qozog‘iston, Gruziya, BAA – vizasiz (30 kungacha) kirish mumkin;
• Shengen zonasi – viza lozim;
• AQSH, Kanada, Buyuk Britaniya – hatto aeroportda bo‘lish uchun ham tranzit viza talab etiladi. Barcha tafsilotlarni mamlakat konsulligi saytida yoki aviakompaniyada tekshirib ko‘rgan ma’qul.

2. Aeroport va terminalni aniqlashtirib oling

Ba’zi shaharlarda bir nechta aeroport mavjud (masalan, Moskva, Istanbul yoki Londonda) va ular orasida almashish kutilganidan murakkab bo‘lishi mumkin. Chiptangizni diqqat bilan tekshiring: agar keyingi parvozingiz boshqa aeroportdan bo‘lsa, u yerga yetib olish uchun qo‘shimcha vaqt talab etiladi. Bu masofa va yo‘llarning bandligiga qarab 30 daqiqadan bir necha soatgacha cho‘zilishi mumkin. Shu sababli, kutilmagan noxush vaziyatlardan qochish maqsadida yo‘nalishlar va mavjud transport vositalarini oldindan puxta o‘rganib chiqish maqsadga muvofiqdir.

3. Yuk masalasini aniqlashtirib oling

Agar ikkala reys ham bitta aviakompaniya yoki uning hamkorlari (masalan, Turkish Airlines, Qatar Airways yoki Emirates) tomonidan amalga oshirilayotgan bo‘lsa, yuk odatda to‘g‘ridan-to‘g‘ri oxirgi manzilgacha ro‘yxatdan o‘tkaziladi. Biroq, agar siz loukosterlarda (Wizz Air, Flydubai, Pegasus) uchayotgan bo‘lsangiz va keyingi reysingizni boshqa aviakompaniya amalga oshirayotgan bo‘lsa, ehtimol yukni qaytadan olish va topshirishga to‘g‘ri keladi.

4. Buyumlaringizni qayerda qoldirish mumkinligini bilib oling

Aeroportda chamadon ko‘tarib yurish noqulaylik tug‘diradi, shu sababli quyidagilarni tekshirib oling:

• Saqlash kamerasi mavjudmi? Misol uchun, Istanbul aeroportida u 24/7 ishlaydi. Boshqa aeroportlardagi saqlash kameralarini LuggageHero, Stasher va Bounce kabi xizmatlar orqali topish mumkin. Ular sizga oldindan joy band qilish va narxlarni ko‘rish imkoniyatini beradi.
• Yukni oldindan topshirish mumkinmi? Ba’zi aeroportlarda ro‘yxatdan o‘tish parvozdan 12 soat oldin boshlanadi. Bu esa, terminal bo‘ylab yuklarni ko‘tarib yurish zaruratidan qutulish, kuch-quvvatni tejash va qo‘llarni bo‘shatib, yanada qulay dam olish yoki sayr qilish imkoniyatini beradi.

Aviakompaniya nimalarni taklif qilayotganini tekshirib ko‘ring

Ba’zi aviakompaniyalar uzoq vaqtli almashish bilan uchadigan yo‘lovchilarga bepul mehmonxona xizmatini taqdim etadi. Bu imkoniyatdan foydalanish uchun ma’lum shartlar mavjud:

• Turkish Airlines – Istanbuldagi mehmonxona almashish vaqti 20 soatdan oshganda
• Qatar Airways – almashish vaqti 12 soatdan 96 soatgacha bo‘lgan parvozlar oralig‘ida Dohada tunash narxi bir kecha uchun 14$ dan boshlanadi.
• Emirates va Flydubai – uzoq vaqtli almashish bilan uchadigan yo‘lovchilar uchun mehmonxonalarda chegirmalar.

Bepul mehmonxona bo‘lmagan taqdirda ham, aviakompaniyalar ba’zan launjga kirish yoki ovqatlanish imkoniyatini berishadi. Buni ma’lumot stendida aniqlashtirish kerak.

Aeroportda vaqtni qanday o‘tkazish mumkin

Agar sizda viza bo‘lmasa yoki shaharga chiqishni xohlamasangiz, aeroport dam olish uchun ajoyib makon bo‘lishi mumkin:

• Launj zonalari. Ko‘pchilik yirik aeroportlarda pullik dam olish joylari mavjud bo‘lib, u yerda dush qabul qilish, ovqatlanish va uxlash imkoniyati bor. Kirish narxi aeroport va xizmat ko‘rsatish darajasiga qarab farqlanadi: o‘rtacha bir necha soat uchun 20 dollardan 50 dollargacha. Priority Pass va LoungeBuddy ilovalari orqali joriy narxlar va mavjud launj zonalari haqida ma’lumot olishingiz mumkin.
• Yoga va sport. Doha va Dubay aeroportlarida sport zallari hamda yoga uchun zonalar mavjud.
• Muzey va galereyalar. Singapurda Changi aeroportining o‘zida kapalaklar va sharsharani, Myunxenda esa aviatsiya muzeyini ko‘rish mumkin.

Vaqtingiz bo‘lsa, shaharga yo‘l oling

Agar almashish vaqti olti soatdan ortiq bo‘lsa va viza imkon bersa, shaharni ko‘rib chiqishga ulgurishingiz mumkin. Ba’zi misollar:

• Istanbul (IST) – Turkish Airlines tomonidan bepul sayohat (agar almashish vaqti 6 soatdan ortiq bo‘lsa).
• Dubay (DXB) – aeroportdan to‘g‘ridan-to‘g‘ri metroga chiqish mumkin, Burj Xalifaga yetib borish uchun taxminan 30 daqiqa vaqt ketadi.
• Seul (ICN) – aeroport tomonidan qisqa sayohatlar, shu jumladan Kyonbokkun saroyiga tashrif buyurishni o‘z ichiga oladi.
• Moskva (SVO, DME) – markazgacha aeroekspressda tezkor marshrutlar

Shaharga chiqishdan oldin, albatta, qaytish yo‘lidagi vaqtni, shu jumladan pasport nazoratidagi ehtimoliy kechikishlarni ham hisobga olib tekshirib oling.

Mehmonxona berilmagan bo‘lsa, qayerda uxlash mumkin?

Aeroportda tunashga to‘g‘ri kelsa, qulay joyni Sleeping In Airports saytidan topishingiz mumkin. U yerda sayohatchilar aeroportlardagi eng yumshoq o‘rindiqlar va qorong‘i zonalar haqida maslahatlar berishgan.

Vaqt yetarli bo‘lgan taqdirda, kapsulali mehmonxonani ijaraga olish (masalan, Doha yoki Singapurda) yoki kutish zallaridagi o‘rindiqlardan foydalanish imkoniyati mavjud.

Uzoq vaqtli almashish kutish azobiga aylanishi shart emas. Yaxshi tayyorgarlik ko‘rilsa, vaqtni qulay o‘tkazish mumkin: yaxshilab uxlab olish, shaharni aylanib ko‘rish yoki hatto spa-salonda hordiq chiqarish. Eng muhimi – oldindan barcha tafsilotlarni aniqlashtirib olish va safar yo‘nalishini puxta rejalashtirish!