Sayohatni xavfsiz boshlash: turistik sug‘urta nima va uni qanday tanlash kerak?

Ba’zida sayohatlarda rejalarimizga kiritilmagan har qanday hodisa yuz berishi mumkin (albatta, sizga faqat yaxshilik tilaymiz). Bularga yukni yo‘qotish, mahalliy taomdan zaharlanish, motosikldan yiqilib tushish yoki oddiy shamollab qolish misol bo‘lishi mumkin. Ko‘plab mamlakatlarda tibbiy xizmatlar qimmat turadi va sug‘urtasiz siz o‘z cho‘ntagingizdan to‘lashga majbur bo‘lasiz – bu juda yoqimsiz holat, ayniqsa hamyonbop sayohatni rejalashtirgan bo‘lsangiz. Ba’zi mamlakatlarga esa kerakli qoplamali sug‘urta polisingiz bo‘lmasa, hatto umuman kiritishmaydi.

Ushbu maqolada bunday vaziyatlarda yordam beradigan sug‘urta turlarini ko‘rib chiqamiz.

Qanday sug‘urta turlari mavjud?

Agar sayohat paketini sotib olgan bo‘lsangiz, odatda sug‘urta narx ichiga kiritilgan bo‘ladi, lekin u faqat minimal xatarlarni qoplaydi. Agar mustaqil sayohat qilayotgan bo‘lsangiz, o‘sha davlatga kirish uchun sug‘urta zarurmi, qancha summaga rasmiylashtirish va qaysi variantlarni tanlash kerakligini oldindan bilib olishingiz lozim. Ko‘pgina tajribali sayohatchilar bunday talab bo‘lmasa ham, sug‘urta qilishni maslahat berishadi, chunki sug‘urta holatida sug‘urta narxi tibbiy xizmatlar narxidan ancha past bo‘ladi.

Sug‘urtaning quyidagi turlarini rasmiylashtirish mumkin:

Majburiy tibbiy sug‘urta (MTS). To‘satdan kasallik yoki jarohat olgan taqdirda asosiy tibbiy xarajatlarni qoplaydigan minimal sug‘urta polisi. Masalan, Shengen vizasiga hujjat topshirish uchun kamida 30 ming yevrolik tibbiy polis rasmiylashtirish zarur.

Bagajni sug‘urtalash. Chamadoningiz sinishi yoki yo‘qolishi mumkin – bu holda sug‘urta zararni qoplashga yordam beradi.

Fuqarolik javobgarligini sug‘urtalash. Tasodifan kimgadir yoki nimagadir zarar yetkazgan bo‘lsangiz, xarajatlarni qoplaydi.

Ketmaslik sug‘urtasi. Agar sayohat kasallik, reysning bekor qilinishi yoki boshqa sabablarga ko‘ra amalga oshmay qolsa, sug‘urta kompaniyasi xarajatlarning bir qismini qoplaydi.

Hujjatlar yo‘qolishini sug‘urtalash. Agar pasport yoki boshqa muhim qog‘ozlar yo‘qolsa, sug‘urta tezda dublikatlarni olishga yordam beradi.

Baxtsiz hodisalardan sug‘urtalanish. Davolanish xarajatlaridan tashqari, tan jarohatlari yoki kasalxonada yotish zarurati uchun tovon to‘lovini ham o‘z ichiga olishi mumkin.

Faol dam olish uchun sug‘urta. Ekstremal sport turlari: g‘avvoslik, tog‘ chang‘isi, parashyut sporti va shu kabilar bilan bog‘liq xavf-xatarlarni qoplaydi.

Homiladorlik asoratlari uchun sug‘urta. Homilador ayollarning sayohati uchun mos keladi, biroq barcha kompaniyalarda ham ushbu sug‘urta turi mavjud emas va odatda homiladorlik muddati bo‘yicha cheklovlarga ega.

Shaxsiy avtomobilda sayohat sug‘urtasi. O‘z mashinangizda sayohat qilishni rejalashtirayotgan bo‘lsangiz, ushbu sug‘urta siz uchun foydali bo‘lishi shubhasiz. U ta’mirlash, evakuatsiya yoki hatto jiddiy nosozliklar yuz berganda avtomobilni uyga qaytarishni qamrab oladi.

Sug‘urta kompaniyasini qanday tanlash kerak?

Sug‘urta kompaniyasini tanlashdan oldin uning reytingiga, polis shartlariga va to‘lovlar tezligiga e’tibor berish kerak. Yaxshisi, sayohatchilarning fikr-mulohazalarini oldindan o‘rganib chiqish va optimal variantni topish uchun bir nechta sug‘urtalovchilarning takliflarini taqqoslash kerak. Quyida O‘zbekistonda sayyohlik sug‘urtasini rasmiylashtiruvchi kompaniyalarga bir nechta misollar keltirilgan: Kafolat, Apex Insurance, Uzbekinvest, Gross Insurance.

Shuni yodda tutingki, oilaviy yoki jamoaviy sug‘urta arzonroq bo‘ladi va agar siz tez-tez sayohat qilib tursangiz, yillik polisni ko‘rib chiqishingiz mumkin. Keraksiz variantlar uchun ortiqcha to‘lovlarsiz tibbiy xarajatlarni qoplaydigan sug‘urtani tanlagan ma’qul.

Bu qancha turadi?

Narx tanlangan variantlar, qoplash miqdori va sayohat davomiyligiga bog‘liq. Ko‘pincha bu kunlik qat’iy belgilangan miqdor yoki tur narxining ma’lum foiziga teng bo‘ladi. Masalan, 30 yoshli sayyoh uchun Fransiyada 8 kun davomida 30 000 yevrogacha bo‘lgan asosiy tibbiy sug‘urta narxi:

Sug‘urta hodisasi yuz berganda nima qilish kerak?

1. Sug‘urta kompaniyasi bilan bog‘laning va qanday harakatlanishingiz zarurligini aniqlashtiring.

2. Barcha kerakli hujjatlarni to‘plang (cheklar, tibbiy ma’lumotnomalar, arizalar).

3. To‘lov rad etilishining oldini olish uchun sug‘urta yo‘riqnomalariga amal qiling.

4. Kompensatsiya uchun barcha xarajatlarni tasdiqlovchi hujjatlarni saqlab qo‘ying.

Qanday sug‘urta hodisalari qoplanmaydi?

Sug‘urta o‘zboshimchalik bilan davolanish, spirtli ichimliklar yoki giyohvand moddalarni iste’mol qilish, sug‘urta polisiga kiritilmagan ekstremal faoliyat turlari, shuningdek, harbiy mojarolar kabi fors-major holatlarini qamrab olmaydi.