Chet elda pasportingizni yo‘qotib qo‘ysangiz, nima qilishingiz kerak
O‘zbekistonlik sayyohlar uchun amaliy qo‘llanma.
Sayohatda pasportni yo‘qotish – noxush, ammo hal qilinishi mumkin bo‘lgan vaziyat. Pasportsiz uyga qayta olmaysiz, shuning uchun tezda to‘g‘ri yo‘l topish juda muhim. Bunday holatda nima qilish kerakligi haqida aytib beramiz.
Oldindan qanday tayyorgarlik ko‘rish kerak
Hech kim hujjatlarini yo‘qotishni istamaydi, ammo bunday holatga tayyor turgan ma’qul:
- Xorijga chiqish pasporti, ID-karta va boshqa muhim hujjatlar, masalan, haydovchilik guvohnomasi, sug‘urta polisi va viza nusxalarini oling yoki suratga oling.
- Ularni bulutli saqlash xizmatiga va flesh-xotiraga saqlang.
- O‘zingiz bilan ID-kartani olib yuring – pasportingizni yo‘qotib qo‘ysangiz, u elchixonada shaxsingizni tasdiqlashga yordam beradi.
- Barcha hujjatlarni o‘zingiz bilan olib yurmang. Sayohatga yoki bozorga borayotganingizda, pasportingizni mehmonxonada qoldiring, lekin uni seyf yoki boshqa ishonchli joyda saqlang.
- O‘zbekistonning siz bormoqchi bo‘layotgan mamlakatdagi elchixonasi yoki konsulligi aloqa ma’lumotlarini oldindan bilib oling.
Pasport yo‘qolgan bo‘lsa nima qilish kerak
- Vahima qilmang. Qanchalik tez va aniq harakat qilsangiz, muammoni shunchalik tezroq hal etasiz.
- Politsiyaga murojaat eting. Yo‘qolganlik to‘g‘risidagi ariza berish majburiydir. Politsiya sizga elchixonada kerak bo‘ladigan ma’lumotnoma beradi.
- O‘zbekiston elchixonasi bilan bog‘laning. U barcha mamlakatlarda mavjud bo‘lmasa-da, eng yaqin joylashgan elchixonaga qo‘ng‘iroq qilib, zarur harakatlar tartibini aniqlashtirish mumkin. Eng so‘nggi chora sifatida sayyohlar huquqlarini himoya qiluvchi tashkilotga murojaat qilishingiz mumkin.
- Elchixonaga boring. Odatda u poytaxtda joylashgani sababli, avtobus yoki mashinada safar qilishingizga to‘g‘ri kelishi mumkin (pasportsiz samolyot chiptalari sotilmasligini unutmang). Ba’zi mamlakatlarda esa O‘zbekistonning bir nechta vakolatxonalari mavjud. Masalan, Qozog‘istonda ular Astana, Olma-ota va Aqto‘be shaharlarida joylashgan. Mamlakatlar va manzillarning to‘liq ro‘yxatini bu yerdan topishingiz mumkin..
- Qaytish guvohnomasini oling. Uni elchixona beradi. Sizga quyidagilar kerak bo‘ladi:
- Politsiyadan ma’lumotnoma;
- 3,5x4,5 sm o‘lchamli ikkita fotosurat;
- O‘zbekiston fuqarosining ID-kartasi yoki uning notarial tasdiqlangan nusxasi (oldindan tayyorlab qo‘yish mumkin).
Ushbu hujjat 14 kun davomida amal qiladi va uyga qaytish imkoniyatini beradi, biroq boshqa mamlakatlarga sayohat qilish huquqini taqdim etmaydi.
O‘zbekistonning turli mamlakatlardagi elchixonalari manzillari
Mamlakat | Manzil | Kontaktlar |
|---|---|---|
Ozarbayjon | +994-12 497-25-49 | |
Qozog‘iston | +7 717 295-42-52 | |
Janubiy Koreya | +82-2 574-65-54 | |
Qirg‘iziston | +996-312 98-62-95 | |
BAA | Abu-Dabi: +9712 448-82-15; | |
Rossiya | +7-499 230-00-78 | |
Turkiya | +90-312 441-38-71 |
Ozarbayjon
Qozog‘iston
Janubiy Koreya
Qirg‘iziston
Rossiya
Turkiya
O‘zbekistonga qaytgandan so‘ng nimalar qilish lozim
- Politsiya bergan hujjatlarni tashlab yubormang. Ular yangi hujjatlarni rasmiylashtirish uchun kerak bo‘lishi mumkin.
- DXM yoki pasport bo‘limiga murojaat qiling. Agar pasportingiz o‘g‘irlangan bo‘lsa, uni tiklash ko‘proq vaqt oladi (politsiya ishni yopmaguncha, uch oygacha). Yo‘qotib qo‘yilgan holatda esa, uni tezroq rasmiylashtirishingiz mumkin.
Bunday vaziyatda qanday choralar ko‘rish kerakligini oldindan bilish yaxshiroq, shunda sayohatingiz stressga aylanib ketmaydi. Eng muhimi, o‘z hujjatlaringizga e’tiborli bo‘ling.
